መልክአ ሥላሴ

በስመ አብ ወወልድ ወመንፈስ ቅዱስ አኃዱ አምላክ ኣሜን 

 መልክአ ሥላሴ

ሰላም ለአብ ወለወልድ ቃሉ ፤

 ወለመንፈስ ቅዱስ ሰላም ዘአካሎሙ አካሉ ፤

 ለማርያም ሰላም እንተ ተሳተፈት ስብሀተ እሉ ፤ 

 ሰላም ለመላእክት ወለማህበረ በኩር ኩሉ ፤

 ጽሑፋነ መልክዕ ወስም በሰማይ ዘላእእሉ ። 

 ሰላም ለአብ ገባሬ ኵሉ ዓለም ፤

 ለወልድ ሰላም ወለመንፈስ ቅዱስ ሰላም ፤ 

 ለማርያም ሰላም ወለመላእክት ሰላም፤

 ሰላም ለነቢያት ወለሐዋርያት ሰላም፤

 ለሰማዕታት ሰላም ወለጻድቃን ሰላም፡፡ 

 ሰላም ለአብ ዘእምቅድመ ዓለም ነጋሲ ፤ 

 ለወልድ ሰላም ስጋ ማርያም ለባሲ ፤

 ወለመንፈስ ቅዱስ ሰላም ኀጢአተ ዓለም ደምሳሲ ፤

 ኀይልየ ስላሴ ወፀወንየ ሥላሴ በስመ ስላሴ እቀጠቅጥ ከይሴ።

 ሰላም ለህላዌክሙ ዘይመውዕ ህላዌያተ፤ 

 ለረኪበ ስሙ ኅቡእ አመ ወጠንኩ ተምኔተ፤ 

 እምግብርክሙ ሥላሴ ሶበ ረከብኩ አስማተ 

 መለኮተ ለለአሃዱ ዘዚኣክሙ ገጻተ፤ 

 እንበለ ትድምርት እሰሚ ወእሁብ ትድምርተ። 

 ሰላም ለስእርተ ርእስክሙ ዘጽድላዌ በረድ ጽላሎቱ፤

 ነገሥተ ባሕታዊ ሥላሴ ዘጋዳክሙ ጸሎቱ፤

 ሥላሴክሙ መሀሩ ቅድስያተ ሠለስቱ፤

 ወብሂለ በዘወሰኩ እግዚአ ሃይላት ዝንቱ፤ 

 ለዋህድናክሙ ምስጢሮ ከሠቱ።

 ሰላም ለዝክረ ስምክሙ ዘኢይትጋባእ እምተከፍሎ ወዘእምተከፍሎ ይትጋባእ ለተሰምዮ አምላክ ወዘይመስሎ፤ ሥሉስ ቅዱስ ሴስዩኒ በተሣህሎ፤ 

 ፍሬ ጽድቅ ከርካዕክሙ ዘእዴክሙ ተከሎ፤ 

 ወፍሬ ወይንክሙ ዘያፀግብ ኵሎ።

 ሰላም ለርእስክሙ ዘአስተዋደደ ርእሰ፤

 አጋዕዝተ ሥጋ ሥላሴ ኢትሌልዩ ነፍሰ፤

 በርእሰ ኢያሱ አንብሩ አክሊለክሙ ሞገሰ፤

 በስምክሙ አሐዱ እስመ ያመልክ ሥሉሰ፤

 ወበስምክሙ ሐነጸ መቅደሰ።

 ሰላም ለገጽክሙ እምዐይነ ፍጡራን ዘተኃብአ፤

 ስብሐቲክሙ ሥላሴ ውስተ አፈ ኵሉ ዘመልዐ፤ 

 አሐዱ መልአክ ሶበ እምቤትክሙ ወፅአ፤

 ዲበ ፍጡራን ከመ ይሰመይ እግዚአ፤

 በአምሳሊክሙ ፈጠርክሙ ሰብአ።

 ሰላም ለቀራንብቲክሙ እለ የሐትታ ዐማፄ፤

 ፍዳ ዐመጻሁ ብዙኅ እስከ ይረክቦ ድንጋፄ፤

 መዛግብትየ ሥላሴ ዘየኀፍረክሙ ፃፄ፤ 

 ይኵነኒ ምሕረትክሙ አመ ዕለተ ፍዳ ሐዋፄ፤ 

 ዘእሳተ ሰማይ ያጠፍእ ወይቀትል ዕፄ።

 ሰላም ለአዕይንቲክሙ እለ ተኬነዋ አዕይንተ፤

 ቅድምናክሙ ሥላሴ ዘኢያመክነየ ጥንተ፤

 ሲሳየ ውሳጤ ይኩነኒ ወክዳነ አፍአ ሜላተ፤ 

 ዘአንደደ ጥበብክሙ እንበለ እሳት እሳተ፤

 ወእንበለ ማይ አቍረረ ማያተ።

 ሰላም ለአዕዛኒክሙ አናቅጸ ጸሎት ሠናይ፤ 

 ምሥጢራተ ሰሚዕ ሥላሴ ዘይተልዎ ርእይ፤

 በአብትረ ያዕቆብ በርሀ ሥላሴክሙ ፀሀይ፤

 ወተመሰሉ ሰብአ ዓይን አባግዓ ላባ ወማይ፤ 

 ለሀበ አባግዕ ዘዮም ወጥምቀት አባይ።

 ሰላም ለመላትሒክሙ እምቅድመ ብርሃናት እለ በርሁ፤

 ሥሉስ ቅዱስ ባልሑኒ እመከራሁ፤ 

 ለንጉሠ ዓለም ተውላጥ ዘትካዛት ሐራሁ፤ 

 እንዘ እሳት ቅንዓቱ ወእንዘ ሓሜት ዕፄሁ፤ 

 እስመ ውስተ ምድር ገሃነም ለሊሁ። 

 ሰላም ለአእናፊክሙ እለ ዓፄነዋ ስብሐታተ፤ 

 ጥበብክሙ ሥላሴ ዘበግብራቲሁ ተከሥተ፤ 

 በዓመተ ሕንፃ ፈንዉ ሊቀ ነደቅት ምጽዋተ፤

 ነዳያነ ወምስኪናነ እንዘ ይሬሲ ጸረበተ፤ 

 ለነፍሰ ዚአየ ከመ ይሕንጽ ቤተ። 

 ሰላም ዕብል ለዘዚአክሙ ከናፍር፤ 

 ተሣህሉኒ ሥላሴ በሣህለ ቤትክሙ ፍቅር፤ 

 እስመ ሃይማኖትየ ሞተት እምነ ሕይወታ ምግባር፤

 እንዘ ብየ ተስፋ ጽሙዕ ጽዋዓ ማይ ቆሪር፤ 

 ወሐዋጼ ብእሲ ድውይ እንዘ ብየ እግር። 

 ሰላም ለአፉክሙ ዘማዕጾሁ ሰላም፤ 

 ጽጌያቲሁ ሥላሴ ለተዋህዶ ገዳም፤ 

 መንገለ አሐዱ አምላክ ንዋየ መጻዒት ዓለም፤ 

 ወልጡ አምልኮትየ በጸጋሙ ፍጹም፤ 

 እምአምልኮ ጣዖት ግሉፍ በዋኅድ ድኅርም። 

 ሰላም ለአስናኒክሙ አስናናተ ሥጋ ዘኢኮና፤

 ዝናማቲሁ ሥላሴ ለተዋህዶ ደመና፤

 አመ ወደይክሙ ሕገ ውሳጤ ነፍሳዊት ልቡና፤ 

 ተአተተት ምስለ አይሁድ ሕገ ደብረ ጽልመት ሲና፤ ወለሕግክሙ ኀደገት መካና። 

 ሰላም ለልሳንክሙ እምቅድመ ነገር ዘተናገረ፤

መንበርክሙ ሥላሴ ዘያደነግፅ መንበረ፤ 

 ሶበ ዐለወክሙ ሕገ ወተጓሕለወክሙ ምክረ፤ 

 ገጸ ኃጉል ዘይደልዎ ዓይነ ቴዎዳስ ነጸረ፤ 

 ወገሊላዊ ይሁዳ ፍና ሞት ሖረ። 

 ሰላም ለቃልክሙ መታሬ እሳት ነዳዲ፤

 ሥሉስ ቅዱስ ንዋያተ ዕፁብ ነጋዲ፤

 አመ በንስሓ ተወልዱ እምጸጋክሙ ወላዲ፤

 ተወፈየ መርኆ ሰማይ የማነ ጴጥሮስ ከሀዲ፤

 ወመምህረ ወንጌል ኮነ ጳውሎስ ሰዳዲ።

 ሰላም ለእስትንፋስክሙ ሕይወተ ሕያዋን ፍጥረታት፤

 ካህናተ ሰማይ ሥላሴ ዘደምክሙ ሥርየት፤

 እምደምክሙ ንዝኁ ራግዛተ ነፍስየ ቤት፤ 

 እስመ አነ ተሐዘብክዎ ወፈተንክዎ ትካት፤

 ለደመ እንስሳ ድኩም ወጽኑስ ጣዖት። 

 ሰላም ለጉርዔክሙ ስቴ አንብዓ ደም ዘኀሠሠ፤ 

 ብዑላነ ሞገስ ሥላሴ ኢታንድዩኒ ሞገሰ፤ 

 እመ ትትኄየዩኒሰ ወተኀድጉኒ ጽኑሰ፤ 

 ሚካኤልኑ ለአምጽኦ ሥጋየ ጌሠ፤ 

 ወእመ አኮ ገብርኤል ወሀበኒ ነፍሰ። 

 ሰላም ለክሣድክሙ ክሣደ አዳም ዘሠዐለ፤

 እምኃይልክሙ ሥላሴ አስተሳትፉኒ ኃይለ፤

 በጠፈረ ሥጋየ አቅም ፀሐየ አርሳንዮስ ገድለ፤ 

 ዘሀለወ ታሕተ ኢያሱ ከመ በኃይልክሙ ክህለ፤ 

 አቅሞ ፀሀይ ዘሀለወ ላዕለ። 

 ሰላም ለመታክፍቲክሙ መሠረተ ዓለም እለ ጾሩ፤ 

 ኖትያተ ኖኅ ሥላሴ ወዕፀወ ዓባይ ሐመሩ፤ 

 ዲበ መንበርክሙ ሰብአ አሐደ ሶበ አምላከ ነጸሩ፤ 

 ኪሩቤል ወሱራፌል ታሕተ እገሪሁ ገረሩ፤ 

 እስመ ለሊሁ አዘዞ ወእሉ ተፈጥሩ። 

 ሰላም ለአእናፊክሙ እሳታውያን አክናፍ፤ 

 እለ በማዕበል ሀለዉ ወእለ ሀለዉ በጽንፍ፤ 

 አለብዉኒ ሥላሴ ቀትለ መስተጋድል መጽሐፍ፤ 

 ከመ ወትረ ይትዋሥአኒ ትምይንተ ቃሉ ትሩፍ፤ 

 ወጉሕሉተ ታድራ ምስሌየ ይዛዋዕ በአፍ። 

 ሰላም ለዘባንክሙ እምቅድመ ዓለማት ዘተቀሥፈ፤ 

 በበትረ ቅድምና ኅቡዕ ከመ ወስተ መጽሐፍ ተጽሕፈ፤

 ሥሉስ ቅዱስ እለ ትትዋሐዱ ዘልፈ፤ 

 ዕቀብዎ እምድቀታት ወረስይዎ ምዕራፈ፤ 

 ለውሳጣዊ ሕንጻየ በአፍአሁ ዘገዝፈ። 

 ሰላም ለእንግድዓክሙ ትዕይንተ ንጉሥ ምክር፤ 

 ሥሉስ ቅዱስ መልሕቃተ ሰማይ ሐመር፤

 ሶበ ይዴግነኒ ባዕስ መልአከ ቅንዓቱ ለፀር፤ 

 ምስለ ኃይል ይባልሐኒ ባሕረ ምሕረትክሙ ፍቅር፤

 ከመ ለእስራኤል ቅድመ ባልሖሙ ባሕር።

 ሰላም ለሕፅንክሙ ምርፋቀ ጻድቃን አግብርቲሁ፤ 

 ማያተ ኢያሱ ሥላሴ ዘትውኅዙ እምኅሊናሁ፤ 

 እስመ በአፍአሁ አንትሙ ወአንትሙ በውሳጤሁ፤ 

 ኢነጸረ ኀበ ሐይመት ከመ አብርሃም አቡሁ፤

 ወመስኮተ ነቢይ ዳንኤል ኢፈቀደ ያርሁ።

 ሰላም ለአእዳዊክሙ እለ ተኬነዋ ብእሴ፤

 ኦ ኄራን አጋዕዝትየ ሥላሴ፤ 

 ድኅረ ጸሐፈ ኦሪተ ሊቀ ነቢያት ሙሴ፤ 

 መሀረኒ ሥላሴክሙ መጽሐፈ መምህሩ ለአውሴ፤ 

 ወወልደ ነጐድጓድ ዮሐንስ ዘመልዖ ውዳሴ።

 ሰላም ለመዝራዕትክሙ መዝራዕተ አዳም ዘአፅንዐ፤ እምአጽናፈ ምድር ሥላሴ እለ ትስዕሩ ጸብዓ፤

 ውስተ ልብየ አብኡ ሀብተ ነሳሕያን መባአ፤ 

 ከመ አብእ ለንግሥክሙ ጸባሕተ አዕይንት አንብዐ፤

 ወበፍቅርክሙ ከመ አሥምር ሰብአ። 

 ሰላም ለኵርናዕክሙ ኵርናዐ ድካም ዘሠበረ፤ 

 ሐረሳውያን ሥላሴ እለ ኢትጻምዉ ወትረ፤ 

 አምጣነ ረሰይክሙ ዘርዐ ሥርናየ ቤትክሙ ፍቅረ፤

 ዘያቀድም ወርኀ ዘርዕ ወዘያተሉ ማዕረረ፤ 

 ውስተ ገራህትክሙ ሰብእ ፍሬ ጽድቅ ሠምረ።

 ሰላም ለእመታቲክሙ መስፈርታተ ምድር ወሰማይ፤ 

 አሰርግዉኒ ሥላሴ በቀጠንተ ምጽዋት ሠናይ፤

 ወረስዩኒ ሐዲሰ እምነ ልማዱ ብሉይ፤

 ለባዕል ዘተሣለቆ ወዘተጓሕለዎ ንዋይ፤ 

 እንዘ በዴዴሁ ይግዕር አልአዛር ነዳይ። 

 ሰላም ለእራኃቲክሙ እለ አኀዛ ዓለመ፤ 

 ደኃራውያን ሥላሴ ወእለ ነበርክሙ ቅድመ፤ 

 ውስተ ልብየ አዝንሙ ዝናመክሙ ሰላመ፤ 

 ኤልያስሰ ኢወሀበኒ ዝናመ፤ 

 እምነ አሐዱ ገራህት ዘያረዊ ትልመ። 

 ሰላም ለአፃብዒክሙ እለ እምአጽፋር ኢይትሌለዩ፤ 

 ለቤትክሙ ሥላሴ ዘኢየኃልቅ ንዋዩ፤ 

 አመ አብዐልክሙ ሰብአ ድኅረ አንደዮ ጌጋዩ፤ 

 ዘኢርእዩ እምቅድመ ዮም መላእክተ ሰማይ ርእዩ፤ 

 ወአግብርተ ሰብእ መላእክት ተሰምዩ። 

 ሰላም ለገበዋቲክሙ እለ ዕሩቃን እምልብሰ ወርቅ፤

 ሥሉስ ቅዱስ ሥርግዋነ መፍርህ መብረቅ፤

 መንገለ ፍኖቱ ምጽዋት ለቆርነሌዎስ ጻድቅ፤ 

 ይምርሐኒ ወንጌልክሙ እግዚአ ፍኖት ረቂቅ፤ 

 ዘጸያሔሁ ዮሐንስ መጥምቅ።

 ሰላም ለከርሥክሙ ከርሠ ፍጡራን ዘፈጠረ፤ 

 ኅዱራነ ሰማይ ሥላሴ ወእለ ትመልኡ ምድረ፤ 

 ህላዌክሙ እምባዕድ ዘኢተለቅሐ ምክረ፤ 

 ይሣርር መሠረታተ እንዘ ይጼዓን ቀመረ፤

 ወእንዘ ይጸውር ድደ ይነብር ጠፈረ። 

 ሰላም ለልብክሙ ዘኢይትሌለይ ፈቃዱ፤

 በተዋህዶ ሥላሴ እለ ትሰገዱ፤ 

 አዳም ኮነ እምኔነ ከመ አሐዱ፤ 

 ቀርነ ንግሥክሙ ሶበ ተነፍሐ በዐውዱ፤

 ሁከተ ሰባልዮስ ኀድአ ወጠፍአ ሞገዱ። 

 ሰላም ለኵልያቲክሙ እለ ዕሩያን በአካል፤

 ዓለመክሙ ሥላሴ አመ ሐወጸ ለሣህል፤ 

 እምኔክሙ አሐዱ እግዚአብሔር ቃል፤ 

 ተፈጸመ ተስፋ አበው በማርያም ድንግል ወበቀራንዮ

 ተተክለ መድኃኒት መስቀል። 

 ሰላም ለህሊናክሙ በከዊነ ኄር ዘተሐምየ፤ 

 እምከላውዴዎን አብርሃም ዘምድረ ካራን ኀረየ፤ 

 ሥላሴክሙ ሥላሴ ሶበ ይኔጽር ዕሩየ፤ 

 ሠለስተ ዕደወ ሊሉያነ ውስተ ርዕሰ ሐይመት ርእየ፤

 ወለአሐዱ ነገሮ ረሰየ። 

 ሰላም ዕብል ለንዋየውስጥ ምሕረትክሙ፤

 ትሩፋተ ገድል ኩኑኒ ሥላሴ አምጣነ ትሩፋት አንትሙ፤ 

 ሶበ ሖርኩሰ ከመ እሳተፍ ገድሎሙ፤ 

 ጊዮርጊስ ኢወሀበኒ መጠነ ነጥበ ጠል እምደሙ፤ 

 ወተክለ ሃይማኖት ከልአኒ ስባረ እምዐፅሙ። 

 ሰላም ለሐቌክሙ ዘቅናተ ኂሩት ቅናቱ፤ 

 ሊሉያነ ፆታ ሥላሴ እምአምላከ በለዓም ከንቱ፤

 ኀበ መስፈርትክሙ ጽድቅ እስመ ያበጽሕ ትእምርቱ፤

 ተደለዉ ከመ ይሑሩ ምሕዋረ ዕለታት ሠለስቱ፤ 

 በዓለ መሥዋዕት አብርሃም ወይስሐቅ መሥዋዕቱ።

 ሰላም አቍያጺክሙ እለ ተኀብአ እምዐይን፤ 

 አናምያኒሁ ሥላሴ ለሜላተ ሰማይ ብርሃን፤

 ልብሰ ሰማዕትና ይኵነኒ ምሕረትክሙ ክዳን፤

 ላዕሌየ እስመ ኢሀሎ ልብሰ እስጢፋኖስ እብን፤ 

 ወሥርጋዌሁ እሳት ለቂርቆስ ሕጻን። 

 ሰላም ለአብራኪክሙ እለ አስገዳ አብራከ፤ 

 ወእለ ኢያብአ ምዕረ ላሕመ ሰማርያ ተውሳከ፤ 

 ሥሉስ ቅዱስ እንዘ ትሬስዩኒ ዐርከ፤ 

 አብሑኒ ለገብርክሙ ከመ እኰንን መልአከ፤

 ወከመ እምሰብእ እሰመይ አምላከ። 

 ሰላም ለአእጋሪክሙ እለ ውስተ ገነት አንሶሰዋ፤

 ሥሉስ ቅዱስ አማልክተ አዳም ወሔዋ፤

 ድካመ ጣዖታት ሞዐ ኀይልክሙ ግዕዛነ ፄዋ፤ 

 ድካምሰ ለዕፀ ኃጢአት ሥርዋ፤ 

 ላዕለ አርጤምስ ዘተረሰያ ነዋ።

 ሰላም ለሰኳንዊክሙ ዘተረሰያ ብርሃናተ፤ 

 ምሕረትክሙ ሥላሴ ያለብወኒ ምሕረተ፤ 

 ለነዳያን ከመ ወሀበ መንፈቀ ንዋዩ ምጽዋተ፤ 

 ወፈደየ ለዘዐመፆ ህየንተ አሐዱ ትርብዕተ፤

 ሊቀ መጸብሓን ዘኬዎስ ዘይሁብ ጻባሕተ። 

 ሰላም ለመክየድከሙ እለ ይከይዳ መብረቀ፤ 

 ኢታኅጥኡኒ ሥላሴ ንዋየክሙ ረቂቀ፤ 

 ሶበ እደ ፈያት ነሥአኒ ጥሪተ ቤትክሙ ጽድቀ፤

 ዘይበኪ በእንቲአየ ወዘያስተሐምም ጥቀ፤ 

 ተመሳሌ አባ ይስሪን እስመ ኄር ኀልቀ። 

 ሰላም ለአጻብዒክሙ እለ ምስለ አጽፋር ተዋደዱ፤ 

 በኀይልክሙ ሥላሴ ዘኢይደክም ልማዱ፤

 እምንጉሠ ባቢሎን ዐብየ ነቢይክሙ አሐዱ፤

 ወለስብእ ሐዋርያት ሰብአ ልስጥራን ሰገዱ፤

 እስከ ለእሉ አልሕምተ ሠዊዐ ፈቀዱ።

 ሰላም ዕብል ለዘዚአክሙ ቆም፤ 

 ዓለማተ ዓለም ሥላሴ ዘአልብክሙ ዓለም፤ 

 እምኔክሙ አሐዱ በእንተ አሐዱ አዳም፤

 እመኒ በምድር ተወክፎ ለነግደ ጲላጦስ ሕማም፤ 

 ሆሳዕና በአርያም ሆሳዕና በአርያም ሆሳዕና በአርያም።

 ሰላም ለመልክእክሙ ዘኢኀደገ አምሳለ፤

 እምፆታ ኵሉ መልክአ ከመ ውስተ መጽሐፍ ተብህለ፤

 ዋህድናክሙ ሥላሴ ሶበ አርዮስ ከፈለ፤

 ሰይፍክሙ ንዋየ ውስጡ ከመ ይፍድዮ በቀለ፤

 ዘእንበለ ሰይፍ ኪያሁ ቀተለ።

 ሥላሴክሙ ሥላሴ ይረስየኒ መካነ፤ 

 ድኅረ ተዋሓድኩሰ ዘሥላሴሁ ብርሃነ፤ 

 ዮርዳኖሰክሙ ዝየ እስመ ኵለንታየ ኮነ፤ 

 ኢየኀሥሥ እምዮርዳኖስ ሰማዕተክሙ ምእመነ፤ 

 ወኢይትሜነዮ ለታቦር እስመ ታቦር አነ።

ኣብዚ ጥብቆ ኣቲና ነዚ ገጽ ፈለው ሸር ሳብስክራይብ ብምግባር ቤተሰብ ንኩን ኩልና  ።"

https://sonstmichael.blogspot.com/2022/09/blog-post_8.html

Please to grow our pages share, like, Follow and subscribe

 ሳብስክራይብ ብምግባር ቤተሰብ ንኩን ኩልና https://youtu.be/FIkzATbCA5Y

https://instagram.com/son_st_michael?igshid=ZDc4ODBmNjlmNQ==

ስብሃት ለእግዚኣብሔር ኣምላክነ ኣሜንንን