ጸሎት ዘዘወትር

 

ጸሎት ዘዘወትር

ጸሎት

አአትብ ገጽየ
ወኲለንታየ
በትእምርተ መስቀል፣
 አሜን።


በስመ አብ: ወወልድ: ወመንፈስ ቅዱስ: አሐዱ አምላክ :
በቅድስት ሥላሴ፣እንዘ ኣአምን ወእትመኃጸን፣ እክህደከ ሰይጣን፣
በቅድመ ዛቲ እምየቅድስት ቤተክርስቲያን፣ እንተይእቲ ስምእየ ማርያም ጽዮን፣
ለዓለመ ዓለም፣አሜን።


ነአኩተከ እግዚኦ ወንሴብሓከ፣
ንባርከከ እግዚኦ ወንትአመነከ ፣
ንስእለከ እግዚኦ ወናስተብቁዓከ ፣
ንገኒ ለከ እግዚኦ፣ ወንትቀነይ ለስምከ ቅዱስ።
ንሰግድ ለከ፣ ኦ ዘለከ፣ ይሰግድ ኩሉ ብርክ ፣
ወለከ ይትቀነይ ኩሉ ልሳን።
አንተ ውእቱ ኣምላከ ኣማልክት፣
ወእግዚኣ ኣጋእዝት ፣ወንጉሰ ነገስት፣
ኣምላክ አንተ ለኩሉ ዘሥጋ ፣ወለኩላ ዘነፍስ፣
ወንጼውኣከ ንሕነ፣ በከመ መሃረነ ቅዱስ ወልድከ ፣
እንዘ ይብል አንትሙሰ ሶበ ትጸልዩ ከመዝ በሉ።


አቡነ ዘበሰማያት ይትቀደስ ስምከ፣
ትምጻእ መንግሥትከ ፣ወይኩን ፈቃድከ ፣
በከመ በሰማይ ፣ከማሁ በምድር፣
ሲሳየነ፣ዘለለ ዕለትነ፣ሃበነ ዮም።
ኅድግ ለነ፣አበሳነ ወጌጋየነ፣
ከመ ንሕነኒ ንኅድግ ለዘአበሰ ለነ።
ኢታብአነ እግዚኦ ውስተ መንሱት፣
ኣላ አድኅነነ ወባልሐነ፣እምኩሉ እኩይ፣
እስመ ዚኣከ፣ይእቲ መንግሥት፣ኃይል ወስብሐት፣
ለዓለመ ዓለም፣አሜን።


በሰላመ፣ ቅዱስ ገብርኤል መልአክ፣
ኦ እግዝእትየ ማርያም ሰላም ለኪ፣
 ድንግል ብኅሊናኪ ፣ወድንግል በሥጋኪ።
እመ እግዚአብሔር ጸባዖት ሰላም ለኪ።
ቡርክት አንቲ እምአንስት፣ ወቡሩክ ፍሬ ከርሥኪ።
ተፈሥሒ ፍሥሕት ኦ ምልእተ ጸጋ እግዚአብሔር ምስሌኪ።
ሰአሊ ወጸልዪ ምሕረት በእንቲኣነ፣
ኀበ ፍቁር ወልድኪ ኢየሱስ ክርስቶስ፣
ከመ ይሥረይ ለነ ኃጣውኢነ።

ጸሎተ ሃይማኖት
ነአምን በአሐዱአምላክ እግዚአብሔር አብ፣
አኃዜ ኩሉ ገባሬ ሰማያት ወምድር ፣
ዘያስተርኢ ወዘኢያስተርኢ።
ወነአምን በአሐዱ እግዚእ ኢየሱስ ክርስቶስ፣
 ወልደ አብ ዋሕድ ዘህልው ምስሌሁ ፣
እምቅድመ ይትፈጠር ዓለም።
ብርሃን ዘእምብርሃን
አምላክ ዘእምአምላክ ዘበአማን
ዘተወልደ ወአኮ ዘተገብረ
ዘዕሩይ ምስለ አብ በመለኮቱ።
ዘቦቱ ኩሉ ኮነ
ወዘእንበሌሁሰ አልቦ ዘኮነ
ወኢምንትኒ ዘበሰማይኒ ወዘበምድርኒ።
ዘበእንቲአነ ለሰብእ ወበእንተ መድኃኒትነ
 ወረደ እምሰማያት ተሰብአ ወተሰገወ እምመንፈስ ቅዱስ
 ወእም ማርያም እምቅድስት ድንግል
ኮነ ብእሴ ወተሰቅለ በእንቲአነ
በመዋዕለ ጲላጦስ ጰንጤናዊ።
ሐመ ወሞተ ወተቀበረ
ወተንሥአ እሙታን አመ ሣልስት ዕለት
በከመ ጽሑፍ ውስተ ቅዱሳት መጻህፍት
 ዓርገ በስብሓት ውስተ ሰማያት ወነበረ በየማነ አቡሁ
ዳግመ ይመጽእ በስብሐት ይኮንን ሕያዋነ ወሙታነ
ወአልቦ ማኅለቅት ለመንግሥቱ።
 ወነአምን በመንፈስ ቅዱስ
እግዚእ ማኅየዊ ዘሠረጸ እም አብ
ንስግድ ሎቱ ወንሰብሖ
ምስለ አብ ወወልድ ዘነበበ በነብያት።
 ወነአምን በአሐቲ ቅድስት ቤተ ክርስቲያን
 እንተ ላእለ ኩሉ ጉባኤ ዘሓዋሪያት።
 ወነአምን በአሐቲ ጥምቀት
ለሥርየት ሓጢኣት
 ወንሴፎ ትንሣኤ ሙታን
ወሕይወተ ዘይመጽእ ለዓለመ ዓለም።


ቅዱስ ቅዱስ ቅዱስ
እግዚአብሔር ጸባዖት
ፍጹም ምሉዕ
ሰማያት ወምድረ
ቅድሳተ ስብሐቲከ።

ንሰግድ ለከ ክርስቶስ
 ምስለ ኣቡከ ኄር ሰማያዊ
ወመንፈስከ ቅዱስ ማኅየዊ
እስመ መጻእከወአድኃንከነ።

 እሰግድ ለአብ ወወልድ ወመንፈስ ቅዱስ አሐተ ሰግደተ። (ሰልስተ ጊዜ በል)
እንዘ አሐዱ ሠለስቱ
ወእንዘ ሠለስቱ አሐዱ
 ይሤለሱ በአካላት
 ወይትዋሐዱ በመለኮት።
 እሰግድ ለእግዝእትነ ማርያም ድንግል ወላዲተ አምላክ።
እሰግድ ለመስቀለ እግዚእነ ኢየሱስክርስቶስ
ዘተቀደሰ በደሙ ክቡር።
መስቀል ኃይልነ፡
መስቀል ጽንዕነ፡
መስቀል ቤዛነ፡
መስቀል መድኃኒተ ነፍስነ
 አይሁድ ክሕዱ ንሕነሰ ኣመነ
ወእለ አመነ በኃይለ መስቀሉ ድኅነ።


ስብሐት ለአብ ስብሐት ለወልድ ስብሐት ለመንፈስ ቅዱስ (ሰለስተ ግዜ በል።)
ስብሐት ለእግዘትነ ማርያም ድንግል ወላዲተ አምላክ፡
 ስብሐት ለመስቀለ እግዚእነ ኢየሱስ ክርስቶስ
ክርስቶስ  በምሕረቱ ይዘከረነ።
አመ ዳግም ምጽአቱ ኢያስተኅፍረነ።
ለሰብሖተ ስሙ ያንቅሀነ
ወበአምልኮቱ ያጽንአነ
እግዝእትነ ማርያም ድንግል ወላዲተ አምላክ አዕርጊ ጸሎተነ፣
 ወአስተሥርዪ ኩሎ ኃጢአተነ
 ቅድመ መንበሩ ለእግዚእነ
ለዘአብልዐነ ዘንተ ኅብስተ
 ወለዘአስተየነዘንተ ጽዋዓ
 ወለዘሠርዐ ለነ ሲሳየነ ወአራዘነ
ወለዘተዐገሠ ለነ ኵሎ ኃጢአተነ
ወለዘወሀበነሥጋሁ ቅዱሰ ወደሞ ክቡረ
 ወለዘአብጽሐነእስከ ዛቲ ሰዓት።
    ነሀብ ሎቱ ስብሐተ ወአኰቴተ ለእግዚአብሔር ልዑል
 ወለወላዲቱ ድንግል። ወለመስቀሉ ክቡር
ይትአኰት ወይሰባሕ ስሙ ለእግዚአብሔር ወትረ ብኵሉ ጊዜ ወበኵሉ ሰዓት።

ሰላምለኪ እንዘ ዝሰግድ ዝብለኪ።
ማርያም እምነ ናስተዘቊዐኪ።
እምአርዌ ነዓዊ ተማህፀነ ብኪ።
 በእንተሐና እምኪ ወኢያቄም አቡኪ።
 ማኅበረነ ዮም ድንግል ባርኪ።



ጸሎት እግዝእትነ ማርያም
ድንግል ወላዲተ ኣምላክ።
ታዐብዮ ነብስየ ለእግዚኣብሔር።
ወትትኃሠይ መንፈስየ በኣምላኪየ ወመድኃንየ፤
 እስመርእየ ሕማማ ለኣመቱ።
ናሁ እምይእዜሰ ያስተበፅዑኒ ኩሉ ትዉልድ።
እስመ ገብረ ሊተ ኃይለ ዐቢያተ ወቅዱስ ስሙ።
 ወሣህሉኒ ለትውልድ ትዉልድ ለእለ ይፈርህዎ።
ወገብረ ኃይለ በመዝራዕቱ፡
ወዘረዎሙ ለእለ የዐብዩ ሕሊና ልቦሙ፡
 ወነሠቶሙ ለኃያላን፣ እመናብርቲሆሙ።
ኣዕበዮሙ ለትሑታን፡ ወኣጽገቦሙ እምበረከቱ ለርኁባን፡
ወፈነዎሙ ዕራቆሙ ለብዑላን ወተወክፎ ለእስራኤል ቍልዔሁ፡
 ወተዘከረ ሣህሎ ዘይቤሎም ለኣበዊነ ለኣብርሃም
ወለዘርኡ እስከ ለዓለም።
ስብሐት ለአብ ወወልድ ወመንፈስ ቅዱስ፡
 ለዓለም ወለዓለመ ዓለም ኣሜን።

ይዌድስዋ

ይዌድስዋ መላእክት ለማርያም በዉስተ ዉሥጤ መንጦላዕት፡ ወይበልዋ በሐኪ ማርያም ሐዳስዩ ጣዕዋ። 
ይቤላ መልአክ ለማርያም ተወከፊዮ ለቃል: ኅቤኪ ይመጽእ ወበማኅፀነ ዚአኪ የኅድር፡
 እፎ ቤተ ነዳይ ኅደረ ከመ ምስኪን እምሰማያት ወረደ ላዕሌሃ: ፈቲዎ ሥነ ዚአሃ ወተወልደ እምኔሃ።
ወበሳድስ ወርኅ ተፈነወ ገብርኤል መልአክ እምኅበ እግዚአብሔር ኅበ አሐቲ ሀገር ዘገሊላ እንተ ስማ ናዝሬት:
 ኅበ ድንግል እንተ ተፍኅረት ለብእሲ ዘስሙ ዮስፍ ዘእምቤተ ዳዊት፡
 ወስማ ለይእቲ ድንግል ማርያም፡
 ቦአ መልአክ ኅቤሃ ወይቤላ ተፈሥሒ ፍሥሕት ኦ ምልእተ ጸጋ እግዚአብሔር ምስሌኪ፡ ቡርክት አንቲ እምአንስት: ወርእያ ደንገፀት እምቃሉ ወሐለየት ወትቤ፡ እፎኑ ከመዝኑ እንጋ አምኃ ይትአምኁ:
ወይቤላ መልአክ ኢትፍርሂ እስመ ረከብኪ ሞገሰ ብኅበ እግዚአብሔር: ወናሁ ትፀንሲ ወትወልዲ ወልደ ወትሰምዪዮ ስሞ ኢየሱስ: ዉእቱ ዐቢይ ወይትሰመይ ወልደ እግዚአብሔር ልዕል። 
ወይሁቦ እግዚአብሔር አምላክ መንበረ ዳዊት አቡሁ።
ወይነግሥ ለቤተ ያዕቆብ ለዓለም ወአልቦ ማኅለቅት ለመንግስቱ፡ 
ትቤሎ ማርያም ለመልአክ እፎኑ ይከዉነኒ ዘንቱ እንዘ ኢየአምር ብእሴ እፎኑ ይከዉነኒ፣ አዉሥአ መልአክ ሃቤኀ ወይቤላ መንፈሰ እግዚአብሔር ቅዱስ ይመጽእ ልዕሌኪ ወኃይለ ልዑል ይጸልለኪ፣
 ዘኒ ይትወለድ እምኔኪ ቅዱስ ዉእቱ ወይሰመይ ወልደ እግዚአብሔር ልዑል፡ ወናሁ ኤልሳቤጥኒ እንተ እምአዝማድኪ ይእቲ ፀንሰት: ወረከበት ወልደ በልኅቃቲሃ ወበርሥዐቲሃ ፡ 
   ወናሁ ሳድስ ዝንቱ ወርኅ ለእንተ ይብልዋ መካን እስመ አልቦ ነገር ዘአይሰአኖ ለእግዚአብሔር፡ 
ትቤሎ ማርያም ለመልአክ ነየ አመቱ ለእግዚአ ኩሉ ነየ አመቱ።ይኩነኒ በከመ ትቤለኒ።

ይቤላ መልአክ ሰላም ለኪ፡
ይቤላ ገብርኤል ሰላም ለኪ፡
ማርያም ድንግል ሰላም ለኪ፡ 
ወላዲተ አምላክ ሰላም ለኪ፡
ማርያም ቅድስት ሰላም ለኪ፡
ማርያም ዉድስት ሰላም ለኪ፡ 
ማርያም ፍሥሕት ሰላም ለኪ፡ 
ማርያም ብፅዕት ሰላም ለኪ፡ 
ማርያም ቡርክት ሰላም ለኪ፡ 
ማኅደረ መለኮት ሰላም ለኪ፡
ደብተራ ፍጽምት ሰላም ለኪ፡
እኅተ መላእክት ሰላም ለኪ፡
ወእመ ኩሉ ሕዝብ ሰላም ለኪ፡
እግዚእትነ ማርያም ሰላም ለኪ፡ 
ሰላማዊት ሰላም ለኪ፡
ቀደሰኪ ለማህደሩ ልዑል ሰላም ለኪ፡ 
አብደረኪ ወኀረየኪ ከመ ትኩኒዮ ማኅደሮ ሰላም ለኪ፡ 
በአልባሰ ወርቅ ዑፅፍት ወኁብርት ሰላም ለኪ።
ክነፈ ርግብ በቡሩር ዘግቡር ሰላም ለኪ፡ 
ወገበዋቲሃኒ በሐመልማለ ወርቅ: ማርያም ሥርጉት ሰላም ለኪ፡
ኆኅተ ምሥራቅ ወእሙ ለብርሃን ሰላም ለኪ፡
ትበርሂ እምፀሓይ ወትትሌዐሊ እምአድባር ሰላም ለኪ፡
ማርያም ኅሪት ወክብርት ሰላም ለኪ፡
ሰአሊ ለነ ኀበ እግዚእነ ወመድኃኒነ ኢየሱስ ክርስቶስ፡ ከመ ያድኅነነ አመ ይመጽእ በስብሐተ አቡሁ ምስለ መላእክቲሁ ቅዱሳን፡ አመ ያቀዉም አባግዐ በየማኑ ወአጣሌ በጸጋሙ፡ ያቁመነ በየማኑ ምስለ እስጢፋኖስ ሰማዕት ወየዉሓንስ መጥመቅ።ወምስለ ኩሎሙ ቅዱሳን ወሰማዕት ለዓለመ ዓለም።