እሴብሕ ጸጋኪ
እሴብሕ ጸጋኪ
ዘዘወትር
እሴብሕ ጸጋኪ ኦ እግዝእትየ ማርያም፤ አንቅሕኒ እምንዋም፤ ወፈውስኒ እምሕማም፤ ወአድኅንኒ እመከራ ዝንቱ ዓለም። ሙዳየ ዕፍረት ማርያም፣ መላእክት ይሴብሑኪ በዓርያም፤ ወበምድር ደቂቀ አዳም ለዓለመ ዓለም።አሜን።
ዘሐዋርያት፣ደብረ ዘይት፣ጻድቃን፣ ሰማዕታት
እሴብሕ ጸጋኪ ኦ እግዝእትየ ማርያም አንቀጸ ብርሃን፤ ወሙዳየ ቅዱስ ቊርባን። ወለተ ነቢያት ቅዱሳን፤ ስብከተ ሐዋርያት ፍንዋን፤ እመ ሰማዕታት መዋዕያን፤ ትምክሕቶሙ አንቲ ለመነኮሳት ገዳማውያን። አመ ይመጽእ ወልድኪ መንፈቀ ሌሊት በሥልጣን፤ አሜሃ ይበክዩ ኃጥአን፤ ወይትፌሥሑ ጻድቃን፤ ትብሕም አፍ ወትትዐሠር ልሳን። አሜሃ ዕለተ ያቁመነ በየማን፤ ምስለ አባግዒሁ ቡሩካን፣ በደብረ ጽዮን መካን፣ ወክመ እምይእዜ ወእስከ ለዓለም።አሜን።
ዘመነ ጽጌ
እሴብሕ ጸጋኪ ኦ እግዝእትየ ማርያም ዕፅ ልምልምት ወፍሬ ጥዕምት፤ እምሐና ወኢያቄም ዘሠረፀት። ሐረገ ወይን ሐረገ ወይን ሐረገ (ዐፀደ) ወይን አንቲ ማርያም (የተሠመረበትን ሐረግ በየምዕራፉ እያስገባህ በል።) ትመስሊ ፊደለ፤ ወትወልዲ ወንጌለ፤ ወታገምሪ መስቀለ።ሐረገ ወይን... ትመስሊ ሰማየ፤ ወትልዲ ፀሐየ፤ ወታገምሪ አዶናየ። ሐረገ ወይን... ትመስሊ መሶበ፤ ወትወልዲ ኮከበ፤ ወታጸግቢ ርኁበ።ሐረገ ወይን... ትመስሊ መቅደሰ፤ ወትወልዲ ንጉሠ፤ ወታገምሪ መንፈስ ቅዱሰ።ሐረገ ወይን... ትመስሊ ጽላተ፤ ወትወልዲ ታቦተ፤ ወታገምሪ መለኮተ።ሐረገ ወይን... ትመስሊ ደመና፤ ወትወልዲ ኅብስተ መና፤ ወታገምሪ ጥዒና። ሐረገ ወይን... ትመስሊ ገራህተ፤ ወታፈርዪ ሰዊተ፤ ወታጸግቢ ነፍሳተ።ሐረገ ወይን... ትመስሊ ስኂነ፤ ወትወልዲ መድኅነ፤ ወትፌውሲ ቁሱላነ። ሐረገ ወይን... ትመስሊ ምሥራቀ፤ ወትወልዲ መብረቀ፤ ወታለብሲ ዕሩቀ።ሐረገ ወይን... ስብሐት ለኪ፤ እምዘበላዕነ ሥጋ ወልድኪ፤ ወእምዘሰተይነ ደመ መሢሕኪ፤ አግብርትኪ ወአእማትኪ ለዓለመ ዓለም። አሜን።
ዘቊስቋም
Com
ዘመድኃኔ ዓለም፣መስቀል
እሴብሕ ጸጋከ ኦ ወልድ ዋህድ መዓልተ ወሌሊተ፤ንፌኑ አኰቴተ፤በእንተ ፍቅረ ሰብእ በዓውደ ጲላጦስ ዘሞተ። ምድረ ዘመሥረተ፤ ወሣረረ ሰማያተ፤ ከመ ገብር ተትሕተ፤ ወተዐገሠ ቅንዋተ መስቀል ወጽፍዐተ። በአንጻረ መስቀል ቀዊሞ ዮሐንስ በከየ፤ እንዘ ይብል ወይልየ ወይልየ፤ አማዑተ ከርሡ ከመ ነደ እሳት ውዕየ።ቀነዉኒ ይቤ እደውየ ወእገርየ፤ ወኈለቊ ኵሎ አዕፅምትየ፤ ከመ ሠራቂ ወፈያት ጸፍዑኒ መልታሕቴየ። ፀሐይ ጸልመ ወወርኅ ደመ ኮነ፤ ወከዋክብት ወድቁ ፍጡነ፤ ከመ ኢይርአዩ ዕርቃኖ ለዘአልበሶሙ ብርሃነ።እምግብረ ግንፋል ሙስና፤ ለዘመርሖሙ መዓልተ በደመና፤ ወሴሰዮሙ መና በሐቅለ ሲና፤ ሰቀልዎ ዲበ ዕፅ በምክረ ቀያፋ ወሐና። አርብዓ መዓልተ ወአርብዓ ሌሊተ፤ ለዘአውረደ ሎሙ ኅብስተ፤ ህየንተ ሠናይ ፈደይዎ እኪተ። ጣኔዎስ ገብረ ላዕለ ዕብራዊ ኃሣረ፤ ባሕቱ ግብርናቶ ኢተዘከረ፤ ዕብራዊ ርጉም ዲበ ፈጣሪሁ ተአየረ። ማኅበራነ አይሁድ ተመድበሉ፤ ለሰቂለ አምላክ ተማሐሉ፤ ክቡረ ንጉሠ ሰቀሉ፤ ደሙ ላዕሌነ ወላዕለ ውሉድነ ይቤሉ። አንስተ ገሊላ ኵሎን፤ አዋልዲሃ ለጽዮን፤አስቆቀዋሁ ለመድኅን፤ ከመ ዖፈ መንጢጥ እንዘ ይሤፅራ ገጾን። ከመ አንበሳ ተንሣእከ፤ እምክቡድ ንዋምከ፤ ከመ ገብር ተትሕትከ፤ ይትኀፈሩ ወይኅሠሩ ኵሎሙ ጸላእትከ። ስብሐት ለከ፤ስብሐት ለዘወለደከ፤ዕበይ ለመንፈስከ፤ ወምሕረተ ፈኑ ለሕዝብከ ለዓለመ ዓለም።አሜን።
Comments
Post a Comment